Naša gimnazijska priča Računajte na nas nastavlja se posjetom Domu starih u Podgorici. Ideja je nastala na časovima dodatne nastave iz engleskog jezika, na kojima su učenici s profesoricom Tanjom Bojić odlučili da izađu iz okvira učionice i pokucaju na vrata onih kojima su potrebni podrška, osmijeh i zagrljaj,
Maturanti Đina Šišević, Julija Mijušković, Teodora Vuksanović, Ajša Reković, Laura Đuričković i Đorđe Purić i učenice drugog razreda dvojezičnog odjeljenja 2-E2 Nina Duborija, Irina Radulović, Sofija Šćekić i Andrea Perić, s direktoricom Biljanom Vučurović i profesoricom Tanjom Bojić, posjetili su Dom starih 8. decembra. Direktorica Doma starih Jelena Šofranac poželjela nam je toplu dobrodošlicu i podijelila s nama korisne informacije o aktivnostima, savjetodavno-terapijskim i socijalno-edukativnim uslugama koje ova ustanova pruža svojim korisnicima. Otvorili su nam vrata svog toplog doma, igrali i pjevali s nama i vratili nas svojim pričama u djetinjstvo i ona dobra stara vremena, a mi smo se potrudili da ih podsjetimo na gimnazijske dane i poručili im da mogu uvijek računati na nas. Radujemo se novim susretima.
