TRAGIČNA SUDBINA INDIVIDUALNE SVIJESTI

Sofija Vujović, Emra Kurgaš, Irena Ajković i Danilo Kovačević iz IV-C preporučuju roman „Majstor i Margarita” Mihaila Bulgakova: „Na prvi pogled konfuzna i nejasna bitka između dobra i zla koja će vam okupirati pažnju i neće vam dozvoliti da knjigu ispustite iz ruku dok god vam ne postane kristalno jasna.

Čitajući roman ’Majstor i Margarita’ postaćete svjedoci paralelnih svjetova, svjedoci borbe između dobra i zla. Kroz neuobičajeno tkanje priče provlačiće vas Voland  sa svojom svitom i umiješaće vas u živote ljudi koji su u vrhu piramide moskovskog kulturnog života. Otvoriće vam se pogled na ’čudne’ slučajnosti života. Vječna  iskušavanja duše, klackanje između pohlepe i straha od kazne, ljudsko razmišljanje o materijalnoj sigurnosti, zavist i nesigurnost čovjeka u samog sebe i svoje postupke pravi su materijal za pozorišni prikaz ’razotkrivanja  crne magije’. Svi ti likovi su zavjesa iza koje se naziru  bezimeni majstor i njegova ljubav prema pisanoj riječi i Margariti. Oboje će se s radošću žrtvovati za dobro onog drugog, ne mareći za sebe ili svoju dušu. I Pontije Pilat je u tu, u svojoj bezvremenoj dilemi ‒ da li je sve učinio da spasi ’dobrog čovjeka’.”